Çağırış islahatları. Ermənistana silah yardımı və generalın ölümü

2009-cu ilin ilk rübündə Azərbaycanın müdafiə və təhlükəsizlik sektorunda baş verən hadisələrə baxış.

"Doktrina" jurnalistlərin hərbi araşdırmalar mərkəzi 2009-cu ilin birinci rübü Azərbaycanın müdafiə və təhlükəsizlik sahəsi üçün gərgin və yaddaqalan hadisələrlə müşayiət olunub. İlin ilk hadisəsi Rusiyanın Ermənistandakı 102 saylı hərbi bazasından Ermənistana ötürdüyü 800 milyon dollarlıq silah və hərbi texnika ətrafında başlanmış qalmaqal oldu. Bu prosesə hələ indiyədək tam aydınlıq gətirilməyib. Daha sonra Azərbaycan Hərbi Hava Qüvvələri və Hava Hücumundan Müdafiə Qoşunlarının komandanı general-leytenant Rail Rzayevin qətlə yetirilməsi bu gün də gündəmdə olan mövzulardandır.
Ötən müddət Azərbaycanın müdafiə sənayesi kompleksinin perspektivləri ilə bağlı ümidverici hadisələrlə də yadda qaldı. Daha bir diqqətçəkən məsələ Azərbaycanın hərbi xidmətə çağırış sistemində dəyişikliklərlə bağlı oldu.
Beləliklə, "Ordunun Aynası" 2009-cu ilin birinci rübündə Azərbaycanın müdafiə və təhlükəsizlik sektorunda baş verən mühüm hadisələri diqqətinizə çatdırır.

Demokratik nəzarət, ordudakı itkilər, nizam-intizam
1-30 yanvar. Azərbaycanda ölkə vətəndaşlarının silahlı qüvvələrə və qanunvericilikdə nəzərdə tutulmuş digər hərbi birləşmələrə çağırışı həyata keçirildi.
1 yanvar. Respublika Hərbi Komissarının müavini vəzifəsində çalışmış polkovnik Tofiq Salmanov Azərbaycanın Rusiyada yeni hərbi attaşesi təyin olundu.
31 yanvar. Hərbi Prokurorluqda ötən ilin yekunlarına dair kollegiya iclası keçirildi. Hərbi prokuror Xanlar Vəliyev bildirdi ki, ötən il Silahlı Qüvvələrdə qeydə alınmış cinayətlərin 99,4 faizi açılıb. Onun sözlərinə görə, cinayətlərin sayı 2007-ci ilə nisbətən 7 faiz az olub. Hərbi prokuror qeyd edib ki, hesabat dövründə maşınları idarəetmə və istismarı qaydalarını pozma cinayəti 60 faiz, silahla və ətrafdakılar üçün yüksək təhlükə törədən əşyalarla davaranış qaydalarını pozma cinayəti 21,7 faiz artıb.
11 fevral. Hərbi Hava Qüvvələri və Hava Hücumundan Müdafiə Qoşunlarının komandanı, müdafiə nazirinin müavini general-leytenant Rail Rzayev qətlə yetirilib. Faktla bağlı CM-nin 120-ci (qəsdən adam öldürmə), 228-ci (qanunsuz odlu silah saxlama) maddələri ilə cinayət işi başlanıb.
17-18 fevral. ATƏT-in Bakı ofisinin təşkilatçılığı ilə Azərbaycanda fəaliyyət göstərən hərbyönümlü ictimai təşkilatlar tərəfindən Silahlı Qüvvələrə demokratik vətəndaş nəzarətinin təmin olunmasına həsr olunmuş konfrans keçirilib.
20 fevral. Milli Məclisin Təhlükəsizlik və müdafiə məsələləri daimi komissiyasının iclasında "Hərbi qulluqçuların intizam həbsi haqqında" qanun layihəsi müzakirə olunaraq parlamentin müzakirəsinə tövsiyə edilib.
1 mart. Ağır Cinayətlərə dair İşlər üzrə Məhkəmənin sədri İnqilab Nəsirov bildirib ki, daxil olan cinayət işləri arasında komandirin əsgəri döyməsi və əsgərin buna görə intihar etməsi, əsgərlərin bir-birlərini nalayiq sözlərlə təhqir etməsi və nəticədə cinayət hadisəsinin baş verməsi kimi hallar var.
5 mart. Bakı Hərbi Məhkəməsində "dedovşina" faktı ilə bağlı proses başa çatıb. Məhkəmənin hökmü ilə Famil Quliyevə 4 il 6 ay, Cabir Yusibov və Adil Abbasova 4 il, Rahid Cəfərov və Elxan Alməmmədovun hər birinə isə 3 il azadlıqdan məhrumetmə cəzası verilib.
5 mart. Ombudsman Elmira Süleymanova işgəncə və "dedovşina" hallarının qarşısını almaq üçün orduya ictimai nəzarətin həyata keçirilməsini vacib sayıb.
6 mart. Milli Məclisdə "Azərbaycanda insan hüquqlarının və azadlıqlarının təmin edilməsi və müdafiəsinin vəziyyəti haqqında" hesabat məruzəsi ilə çıxış edən Ombudsman Elmira Süleymanova hərbi qulluqçuların hüquqlarının müdafiəsi istiqamətində vəziyyətin qənaətbəxş olmadığını bildirib.
12 mart. Baş Prokurorluğun mətbuat xidmətinin rəhbəri Eldar Sultanov Rail Rzayevin qətli ilə əlaqədar başlanmış istintaqla bağlı hər hansı yeniliyin olmadığını bildirib.
16 mart. Prezident İlham Əliyev Azərbaycan vətəndaşlarının 2009-cu ilin aprelin 1-dən 30-dək həqiqi hərbi xidmətə çağırılması və müddətli həqiqi hərbi xidmət qulluqçularının ehtiyata buraxılması haqqında fərman imzalayıb.
29 mart. Tərtərdəki "N" saylı hərbi hissənin əsgəri, Zərdab rayon Hərbi Komissarlığından həqiqi hərbi xidmətə çağırılmış Yasəf Qasımov əsgər yoldaşları İlkin Abdullayev və Tural Həsənova xidməti silahından atəş açaraq öldürüb.
30 mart. Gənc çağırışçıların hərbi hissələrə paylanılması funksiyasının Respublika Hərbi Komissarlığından alınması barədə məlumat yayıldı. Baş nazirin birinci müavini Yaqub Eyyubovun imzaladığı qərarla hərbi xidmətə çağırış üzrə Respublika Çağırış Komissiyasının yeni tərkibi təsdiqləndi. Əvvəlki illərdən fərqli olaraq komissiyanın sədri postuna respublika hərbi komissarının müavini Ramiz Məmmədov təyin edildi.
31 mart - 1 aprel. ATƏT-in Bakı ofisi Naxçıvan MR-in Sədərək rayonunda "Azərbaycanın sərhədyanı ölkələri ilə sərhədyanı təhlükəsizliyinin təmin olunması və proqramların reallaşdırılması" mövzusunda seminar keçirib. Seminar Azərbaycandan və Türkiyədən olan sərhəd və gömrük xidmətçiləri üçün təşkil olunub.

Ermənistan - Azərbaycan münaqişəsi
26 yanvar. Ermənistan silahlı qüvvələrinin birləşmələri Azərbaycan postlarından birini ələ keçirmək və beləliklə, öz mövqelərini möhkəmləndirmək məqsədilə Ağdamın Cəvahirli kəndi istiqamətində Azərbaycan Ordusuna doğru irəliləməyə başlayıb. Bir saata yaxın gedən döyüş nəticəsində erməni tərəfi üç itki və bir neçə yaralı verərək geri çəkilib.
27 yanvar. ATƏT-in fəaliyyətdə olan sədrinin şəxsi nümayəndəsinin mandatına uyğun olaraq Azərbaycanın Naftalan rayonunun cənubunda yerləşən Borsunlu kəndinin cənubundakı qoşunların təmas xəttində monitorinq keçirilib.
31 yanvar. Azərbaycanın ikinci ordu birləşməsinin komandiri general-mayor Mahmud Həmzəyev Ermənistanın Azərbaycanın işğal olunmuş rayonlarında əsasən muzdluların xidmətindən istifadə etdiyini bəyan edib.
11 fevral. Ağdam rayonunun Sarıcalı kəndi yaxınlığında Ermənistan - Azərbaycan qoşunlarının təmas xəttində ATƏT-in fəaliyyətdə olan sədrinin şəxsi nümayəndəsinin mandatına uyğun olaraq monitorinq keçirilib.
26 fevral. Cəbhə xəttində (Füzuli - Horadiz yolu yaxınlığında) keçirilən monitorinq zamanı ermənilər ATƏT-in fəaliyyətdə olan sədrinin şəxsi nümayəndəsi Anjey Kaspşiki və onun səhra köməkçilərini atəşə tutublar.
27 fevral. Erməni silahlı qüvvələrinin 3 əsgəri - Qrant Markosyan, Alik Tevosyan və Artur Sarkisyan Ağdam istiqamətində cəbhə xəttini keçərək Azərbaycan tərəfinə əsir düşüblər. Onlar səbəb kimi erməni ordusunda vəziyyətin dözülməz olduğunu bildiriblər.
28 fevral. Azərbaycanın Qarabağdakı və Ermənistanla sərhəddəki qüvvələrinin Daxili Qoşunlar və Sərhəd Qoşunları ilə əvəzlənə biləcəyinə dair məlumatlar yayılıb.
2 mart. Ermənistan silahlı qüvvələri üç erməni əsgərinin Azərbaycan tərəfinə keçdiyini təsdiqləyib.
5 mart. Fevralın 26-da ATƏT nümayəndələrinin qoşunların təmas xəttində keçirilən monitorinq zamanı baş vermiş insident Vyanada ATƏT-in Daimi Şurasının iclasında müzakirə edilib.
5 mart. MN rəsmisi bəyan edib ki, fevralın 27-də Azərbaycan tərəfinə keçmiş 3 erməni əsgəri Ermənistana qayıtmaqdan imtina edib və Azərbaycan hökumətindən 3-cü ölkəyə getmələri barədə xahiş ediblər.
11 mart. ATƏT-in fəaliyyətdə olan sədrinin şəxsi nümayəndəsinin mandatına uyğun olaraq Azərbaycanın Füzuli rayonunun ərazisində, Füzuli - Horadiz yolu yaxınlığında qoşunların təmas xəttində monitorinq keçirilib.
12 mart. 2008-ci ilin mayında Ermənistan ordusundakı özbaşınalıq və zorakılığa etiraz olaraq Azərbaycana qaçmış Ermənistan ordusunun əsgəri Paruyr Stepanyan öz arzusuna uyğun olaraq üçüncü ölkəyə ötürülüb.
12 mart. Hökumətin ötən ilin yekunları ilə bağlı parlamentə təqdim etdiyi hesabatda bildirilib ki, 2008-ci ildə Ermənistan xüsusi xidmət orqanlarının tapşırığı ilə Azərbaycan ərazisində kəşfiyyat-agentura fəaliyyəti ilə məşğul olan 10 nəfər barəsində cinayət işi açılıb. Onların 9-u hərbi, biri isə mülki şəxs olub.
25-27 mart. Ermənistan Silahlı Qüvvələrinin Ağdam rayonunun işğal olunmuş ərazilərində artilleriya və zirehli texnikanın iştirakı ilə təlimlər keçirdiyi xəbəri yayılıb.
31 mart. ATƏT-in fəaliyyətdə olan sədrinin şəxsi nümayəndəsinin mandatına uyğun olaraq Qazax rayonunun Məzəm kəndi yaxınlığında qoşunların təmas xəttində monitorinq keçirilib.

Nato çərçivəsində əməkdaşliq və beynəlxalq münasibətlər
1 yanvar. Türkiyənin NATO ilə Azərbaycan arasında 16 illik "əlaqə dövləti" statusuna son qoyuldu. Növbəti 2 ildə (2009-2010) NATO ilə Azərbaycan arasında "əlaqə dövləti" statusuna Rumıniya malik olacaq.
12-16 yanvar. Bakıda "Regional Resronse-2009" təliminin yekun planlaşdırma konfransı keçirildi.
19 yanvar. Belçikanın Azərbaycana yeni təyin olunmuş səfiri Filip Jottar müdafiə naziri Səfər Əbiyevlə görüşündə Belçika ilə Azərbaycan arasında hərbi əməkdaşlıq sazişinin imzalanması üçün görülən işlərin yekunlaşdığını bildirib.
23 yanvar. Polşa Silahlı Qüvvələri Baş Qərargahının rəisi general Françiek Qaqor Azərbaycana səfər edib. Onun müdafiə naziri Səfər Əbiyevlə görüşündə ikitərəfli əməkdaşlıq məsələləri müzakirə olunub.
24-28 yanvar. Azərbaycan müdafiə sənayesi nazirinin müavini Tofiq Rəfiyevin rəhbərlik etdiyi nümayəndə heyəti Pakistanda səfərdə olub.
24-31 yanvar. Dövlət Sərhəd Xidmətinin yüksəkvəzifəli nümayəndələri ABŞ-da səfərdə olublar.
26-31 yanvar. Bakıda Azərbaycan - NATO Beynəlxalq Məktəbinin (NISA) "Yeni müharibələr və müasir münaqişələr" mövzusunda qış sessiyası keçirilib.
28 yanvar. Rumıniyanın Azərbaycandakı səfiri Nikolay Ureki ölkəsinin NATO ilə Azərbaycan arasında "əlaqə dövləti" statusuna yiyələnməsi ilə əlaqədar Azərbaycan xarici işlər nazirinin müavini Araz Əzimovla görüşüb.
6 fevral. 14 mart 2008-ci ildə imzalanan "Türkiyə Respublikası Baş Qərargahı ilə Azərbaycan Respublikası Müdafiə Nazirliyi arasında Azərbaycan Ali Hərbi Təyyarəçilik Məktəbinə təlim-təhsil dəstəyi haqqında saziş" Türkiyə Nazirlər Kabineti tərəfindən təsdiq edilib.
11 fevral. DSX Sahil Mühafizəsinin rəisi general-mayor İlham Mehdiyev Ankarada Türkiyə Sahil Mühafizəsinin komandanı vitse-admiral Atilla Kezekle görüşüb.
16 fevral. Almaniyanın Ştutqart şəhərində Azərbaycan - ABŞ ikitərəfli hərbi əməkdaşlıq üzrə işçi görüşü keçirilib. Görüşdə ABŞ-la Azərbaycan arasında hərbi sahədə əməkdaşlığın prioritetləri, 2009-2010-cu illərdə Hərbi Əməkdaşlıq üzrə İş Planının ilkin layihəsi hazırlanıb.
18-19 fevral. Müdafiə naziri Səfər Əbiyev Polşanın Krakov şəhərində NATO ölkələrinin və Əfqanıstana töhfə verən tərəfdaş dövlətlərin müdafiə nazirlərinin görüşündə iştirak edib.
20 fevral. Bakıda NATO-nun Azərbaycanla əlaqə səfirliyi (CPE - Contact Point Embassy) statusunda olan dövlətin Türkiyədən Rumıniyaya təhvil verilməsi ilə əlaqədar tədbir keçirilib.
22-26 fevral. Müdafiə naziri Səfər Əbiyev Əbu-Dabi şəhərində keçirilən 9-cu beynəlxalq müdafiə sərgisində (IDEX - 2009) iştirak edib.
24-26 fevral. Bakıda NATO-nun Birləşmiş Qüvvələr Komandanlığının nümayəndə heyəti ilə Azərbaycanla NATO arasında hərbi təhsil, kadr hazırlığı, həmçinin sülhyaratma əməliyyatlarında iştirak edən bölmələrin hazırlanması və s. məsələlər müzakirə edilib.
26 fevral. Azərbaycan Əfqanıstana əlavə 45 sülhməramlı göndərib. Bununla da Əfqanıstandakı sülhməramlılarımızın sayı 90 nəfərə çatıb.
6 mart. Müdafiə naziri Səfər Əbiyev Qətərin Azərbaycandakı fövqəladə və səlahiyyətli səfiri Şeyx Mübarək Bin Həfd Yasim əl-Tanini qəbul edib.
9 mart. Prezident İlham Əliyev, müdafiə naziri Səfər Əbiyev Türkiyə Jandarm Qüvvələri komandanı ordu generalı Atilla İşıkı qəbul ediblər.
9-11 mart. Bakıda Əfqanıstandakı Hərbi Əməliyyatlara dəstək üçün Nəqliyyat Dəhlizlərinin Əlaqələndirilməsi mövzusunda beynəlxalq konfrans keçirilib.
10 mart. Müdafiə naziri Səfər Əbiyev Rusiyanın səfiri Vasili İstratovu səlahiyyət müddətinin başa çatması münasibətilə qəbul edib.
10-13 mart. Azərbaycan Müdafiə Nazirliyinin Zirehli Texnika Xidmətinin rəisi polkovnik Sakit Verdiyevin rəhbərlik etdiyi nümayəndə heyəti Gürcüstanda səfərdə olub.
10-14 mart. Pakistan Hərbi Dəniz Qüvvələri Müdafiə Kollecinin 38-ci qərargah kursunun iştirakçıları Azərbaycana səfər ediblər.
11 mart. Azərbaycan nümayəndə heyəti mayın 19-22-də Moskvada keçirilməsi planlaşdırılan VIII "Kompleks təhlükəsizlik - 2009" təhlükəsizlik texnologiyaları sərgisinə dəvət olunub.
11 mart. Daxili işlər naziri Ramil Usubov və Dövlət Sərhəd Xidmətinin rəisi Elçin Quliyev Türkiyə Jandarm Qüvvələrinin komandanı Atilla İşıkı qəbul ediblər.
12 mart. Azərbaycanın xarici işlər naziri Elmar Məmmədyarov bildirib ki, hazırda Qəbələ RLS-in başqa ölkənin istifadəsinə verilməsi, Rusiya ilə müqavilənin uzadılıb-uzadılmayacağı kimi məsələlər gündəlikdə deyil.
13 mart. Müdafiə naziri Səfər Əbiyev Macarıstanın Azərbaycana yeni təyin olunmuş səfiri Ceno Boroşu qəbul edib.
29-30 mart. Müdafiə naziri Səfər Əbiyev Qətərdə rəsmi səfərdə olub.

Silah qalmaqali
8 yanvar. Ermənistanın Gümrü şəhərində yerləşən, Rusiya hərbi qüvvələrinə məxsus 102 saylı hərbi bazadan Ermənistanın hərbi qüvvələrinə 800 milyon ABŞ dolları dəyərində hərbi silah və sursatın verilməsinə dair məlumat ortaya çıxdı. Rusiya səfiri yanvarın 12-də məsələ ilə əlaqədar Azərbaycan XİN-ə dəvət edildi.
15 yanvar. Azərbaycan XİN Rusiyadan Ermənistan ordusuna yeni silah-sursat, hərbi texnika və avadanlıq ötürülməsi haqda informasiyalarla bağlı bəyanat verib. XİN Azərbaycan ərazilərinin işğalının güclənməsinə yardımçı olan bu cür addımlara qarşı etirazını bildirib. Yanvarın 16-da Rusiya tərəfinin təşəbbüsü ilə Azərbaycanın xarici işlər naziri Elmar Məmmədyarovla onun rusiyalı həmkarı Sergey Lavrov arasında məsələ ilə bağlı telefon danışığı olub.
22 yanvar. Azərbaycan XİN başçısı Elmar Məmmədyarov Rusiya səfiri Vasili İstratovu qəbul edib. Səfir "silah qalmaqalı" ilə bağlı Azərbaycan XİN-in verdiyi rəsmi notaya Rusiya tərəfinin cavab notasını təqdim edib.
30-31 yanvar. Azərbaycanın müdafiə naziri Səfər Əbiyev "silah qalmaqalı" ilə əlaqədar Rusiyada səfərdə olub.
2 fevral. Azərbaycan Milli Məclisi "silah qalmaqalı"nı araşdırmaq üçün Moskvaya nümayəndə heyəti göndərməyi qərara alıb.
5 mart. MN mətbuat xidmətinin rəhbəri Eldar Sabiroğlu bildirib ki, silah məsələsində sona qədər getmək lazımdır və Azərbaycan tərəfi bunu edəcək.
12 mart. Azərbaycana səfərə gəlmiş Rusiya xarici işlər naziri Sergey Lavrov "silah qalmaqalı" ilə bağlı suallara cavab verib: "Azərbaycan və Rusiya mediasında yayılan sənəd ətrafında yaradılan ajiotaja gəlincə, artıq sübut olunub ki, bu sənəd saxtadır".

Müdafiə sənayesi
21 yanvar. Ukraynanın "Avtokraz" holdinq şirkəti 2009-cu il ərzində Azərbaycanda, Qazaxıstanda və Özbəkistanda diler şəbəkəsi yaratmaq niyyətini açıqlayıb. Məlumatda bildirilir ki, adıçəkilən ölkələrin güc strukturları "Kraz" markalı hərbi maşınlara hədsiz maraq göstərir və artıq konkret sifarişlər var.
24 yanvar. Azərbaycan Müdafiə Sənayesi Nazirliyinin məhsullarını ("İstiqlal" snayper tüfəngi, optik nişangahlar, motodor və morodor tipli texnikalar, avtomatik qumbaraatanlar və elektron çap lövhələri) ilk dəfə müstəqil şəkildə IDEF-2009 beynəlxalq müdafiə sərgisində 30 kvadratmetrlik stenddə nümayiş etdirəcəyi xəbəri yayılıb. Sərgi aprel ayının 27-29-da keçiriləcək.
29 yanvar. MSN-də 2008-ci ilin yekunlarına və 2009-cu ildə görüləcək işlərə həsr olunmuş kollegiya iclası keçirilib.
29 yanvar. Azərbaycanın hərbi qurumları oktyabrın 27-30-da Moskvada keçiriləcək "INTERPOLITEX-2009" təhlükəsizlik və mühafizə texnologiyaları sərgisinə dəvət olunub.
12 mart. Hökumətin parlamentə təqdim etdiyi hesabatda bildirilib ki, Azərbaycanın hərbi müəssisələrində 2008-ci ildə 18 adda müdafiə təyinatlı məhsulun yaradılması üzrə tədqiqat işləri başa çatdırılaraq silahlanmaya qəbul olunub.
16 mart. Azərbaycan ABŞ-ın "Narris Corroration" şirkətindən radiostansiyalar alıb.
16 mart. Prezident İlham Əliyev MSN-in "Cihaz" istehsalat birliyinin əsaslı yenidənqurmadan sonra istifadəyə verilən "Radioquraşdırma" zavodunun və Elektron Hesablayıcı Maşınlar zavodunun açılışında iştirak edib. Eyni zamanda, İ.Əliyev nazirliyin elmi-tədqiqat institutunun açılışında da iştirak edib.
16 mart. "Radioquraşdırma" zavodunun açılışında müdafiə sənayesi naziri Yavər Camalov bildirib ki, bu il Azərbaycanın hərbi sənaye kompleksində 435 adda müdafiə təyinatlı məhsulların və onların ehtiyat hissələrinin istehsalı nəzərdə tutulur.
25 mart - 17 aprel. Bakıda "Narris" rabitə avadanlıqlarının quraşdırılması ilə bağlı tədbir keçirilir.

Güc strukturlari, digər qurumlar
13 yanvar. Prezident İlham Əliyev "Azərbaycan Respublikası milli təhlükəsizlik orqanlarının 90 illiyi (1919-2009)" yubiley medalının təsis edilməsi haqqında" qanunun tətbiq edilməsi barədə fərman verib.
16 yanvar. Prezident İlham Əliyev bildirib ki, 2009-cu ildə ordunun büdcəsi artırılıb və Azərbaycanın hərbi xərcləri 2,3 milyard dollar təşkil edəcək.
22 yanvar. Daxili İşlər Nazirliyinin Daxili Qoşunlar Baş İdarəsində əsgər və zabitlərin, bütövlükdə, hərbi qulluqçuların və onların valideynlərinin təklif, irad və şikayətlərini operativ qəbul edib araşdırmaq məqsədilə "qaynar xətt" fəaliyyətə başlayıb - 560-17-11.
30 yanvar. Dövlət Gömrük Komitəsinin sədri Aydın Əliyev 2009-cu ilin sonunadək Azərbaycan Dövlət Gömrük Komitəsində Risklərin İdarəolunması Mərkəzinin fəaliyyətə başlayacağını bildirib. Bu mərkəzdə risk analizləri aparılacaq, qaçaqmalçılıqla mübarizə sahəsindəki vəziyyət təhlil olunaraq müvafiq tədbirlər görüləcək.
30 yanvar. Azərbaycan Daxili Qoşunlarının vertolyot eskadrilyası yaradılıb. DQ tarixində ilk dəfədir yaradılan aviasiya eskadrilyasına "Mi" markalı vertolyotlar daxildir.
19 fevral. DSX Sahil Mühafizəsinin rəisi general-mayor İlham Mehdiyev bildirib ki, rəhbərlik etdiyi qurum bu ilin yay aylarında Xəzər dənizində növbəti genişmiqyaslı taktiki təlimlər keçirməyi planlaşdırır. General bu il Xəzər dənizində 2 yeni radiolokasiya stansiyasının qurulacağını, bununla da Xəzərin Azərbaycan sektoruna tam nəzarət imkanı əldə olunacağını bildirib.
2 mart. Prezident İlham Əliyev Bərdə rayonuna səfəri çərçivəsində Daxili Qoşunların hərbi hissəsi üçün inşa olunmuş şəhərcikdə olub.
2 mart. Prezident İlham Əliyev Xüsusi Dövlət Mühafizə Xidmətinin İxrac Neft və Qaz Boru Kəmərlərinin Təhlükəsizliyi İdarəsinin Yevlax regional şöbəsinin şəxsi heyəti üçün tikilmiş xidməti yaşayış binasının açılışında iştirak edib.
6 mart. MN-in adı açıqlanmayan rəsmisi bildirib ki, Azərbaycanın Strateji Müdafiə İcmalı 2010-cu ildə hazır olacaq.
6 mart. Prezident İlham Əliyevin iştirakı ilə DSX-nin hərbi hissəsinin açılışı olub.
12 mart. Daxili Qoşunların yaranması günü qeyd edilib. Prezident İlham Əliyevin imzaladığı sərəncamla Daxili Qoşunların hərbçiləri təltif olunub.
12 mart. Hökumətin parlamentə təqdim etdiyi hesabatda bildirilib ki, 2008-ci ildə DSX-nin Naxçıvan Sərhəd Diviziyasında 2 sərhəd zastavası, Göytəpə Sərhəd Dəstəsində 4 mənzilli yaşayış binası, Zaqatala Sərhəd Dəstəsində 3 zastava kompleksi, Sahil Mühafizə bazası, Şimal DRES Sahil məntəqəsi, Hərbi Hospitalda kompüter tomoqrafiyası binası, Şüvəlan qəsəbəsində hərbi hissə, DSX Akademiyasının "Sitalçay" Təlim-Tədris Mərkəzi, "Sərhədçi" istirahət mərkəzində 2 mərtəbəli məişət kompleksi istifadəyə verilib.
12 mart. Hökumətin parlamentə təqdim etdiyi hesabatda bildirilib ki, Fövqəladə Hallar Nazirliyi Rusiyadan 2 ədəd "Ka-32A" markalı vertolyot alacaq.
19 mart. Dövlət Miqrasiya Xidmətinin yaranmasının 2-ci ildönümü qeyd olunub.
28 mart. Azərbaycan milli təhlükəsizlik orqanlarının yaranmasının 90 illiyi qeyd olunub. Prezident İlham Əliyevin imzaladığı sərəncamla MTN-in əməliyyat-texniki idarəsinin rəisi Natəvan Mirvətovaya general-mayor hərbi rütbəsi verilib.

Regional təhlükəsizlik
4 fevral. Kollektiv Təhlükəsizlik Müqaviləsi Təşkilatına üzv dövlətlərin Moskvada toplanan prezidentləri kollektiv hərbi qüvvələrin yaradılması haqda layihəni imzaladılar.
10 fevral. Rusiya Xarici İşlər Nazirliyi bəyan edib ki, Moskva Xəzərdə "Kasfor" çevik əməliyyat qüvvələrini yaratmağa hazırdır və bu, region ölkələrinin iştirakı olmadan da baş tuta bilər.
13 fevral. Kollektiv Təhlükəsizlik Müqaviləsi Təşkilatının baş katibi Nikolay Bordyuja Rusiya və Ermənistanın vahid Hava Hücumundan Müdafiə Sistemi yaradacaqlarını bildirib.
2 mart. KTMT-nin baş katibi Nikolay Bordyuja Yerevanda bəyan edib ki, "Dağlıq Qarabağ münaqişəsinə dair hərbi əməliyyatlar yenidən bərpa olunsa, KTMT-nin çevik qüvvələr kontingentindən istifadə edilməyəcək".
4 mart. ABŞ Konqresinin büdcə bürosu "Avropada raketəleyhinə müdafiə sistemlərinin yerləşdirilməsi variantları" adlı məruzəni açıqlayıb. Çoxsəhifəli tədqiqatda RƏM sisteminin yerləşdirilməsi ilə bağlı 3 sxem təklif edilib və onların hər birinə Azərbaycanın adı salınıb.
4 mart. ABŞ səfiri Ənn Dörsi bildirib ki, Şərqi Avropada raket hücumundan müdafiə sisteminin yaradılması Obama administrasiyasının Rusiya ilə müzakirə edəcəyi mövzulardan biri olacaq.
16 mart. Müdafiə Nazirliyi Rusiyanın pilotsuz kəşfiyyat təyyarəsinin Azərbaycanın hava sərhədlərində sınaqdan çıxarılması barədə "Aviation Week" jurnalının xəbərini təkzib edib.
19 mart. Amerikanın "The New York Times" qəzeti yazıb ki, əgər Amerika və Qırğızıstan rəsmiləri arasında Manas aviabazasının icarəsi ilə bağlı son danışıqlar nəticə verməsə, sözügedən bazanı əvəz etməyə əsas namizəd Bakı olacaq.

Beynəlxalq hesabatlar, təhlillər
25 yanvar. Londonda yerləşən Beynəlxalq Strateji Araşdırmalar İnstitutu dünya ölkələrinin hərbi potensialını qiymətləndirən illik hesabatını açıqlayıb. 170 ölkəni əhatə edən hesabatda Azərbaycan və Ermənistanın da orduları haqda məlumatlar yer alıb.
6 fevral. ABŞ-ın məşhur "Yane's" araşdırma şirkəti Rusiya və MDB-nin silahlı qüvvələrinə dair son hesabatını açıqlayıb. Sənəddə Azərbaycanın müdafiə və təhlükəsizlik sektorunda vəziyyətə də toxunulub.
20 mart. Silahlı Qüvvələrə Demokratik Nəzarət üzrə Cenevrə Mərkəzinin (DCAF) "Müdafiə təsisatları: Azərbaycan, Ermənistan, Gürcüstan və Moldovanın tələbatlarının qiymətləndirilməsi və ölkələr üzrə təhlillər" kitab-hesabatının İnternet versiyasında Azərbaycanın müdafiə sektorundakı vəziyyət kəskin tənqid olunub.

C.SÜMƏRİNLİ

Bu məqalə NATO-nun Ictimai Diplomatiya Bölməsinin dəstəyi ilə «Ayna» ve «Zerkalo» qazetlərində dərc olunan   "Ordunun Aynası" ("Armeyskoe Zerkalo") layihəsi çerçivəsində internet səhifəmizdə yerləşdirilir.